Հունահայ համայնքի ներկայացուցիչները տեղեկացրեցին, որ համայնքը վերջին տարիներին համալրվել է Հայաստանից արտագաղթած հայերով: Նշվեց, որ եթե Աթենքի շրջանում գործում է երեք հայկական դպրոց, ապա Հունաստանի հյուսիսային շրջաններում այդպիսիք չկան, եւ հազարավոր հայ ընտանիքների երեխաներ զրկված են հայոց լեզու սովորելու հնարավորությունից: Խնդիրը լուծելու ուղին մեկօրյա հայկական դպրոցների բացումն է: Հունաստանի հյուսիսային շրջաններում արդեն գործում է 4 մեկօրյա դպրոց, որտեղ ուսուցումը տարվում է նաեւ արեւելահայերենով: Եւս մեկ դպրոց նախատեսվում է բացել մինչեւ սեպտեմբերի 1-ը:
 Նախարար Հ. Հակոբյանին ներկայացվեց Հունաստանի հայկական դպրոցներին անհրաժեշտ գրքերի ցանկը: Կարեւորվեց ՀՀ կառավարության կողմից Հայաստանից Սփյուռք հնարավորինս արդյունավետ եղանակներով գրքերի փոխադրման խնդրի կարգավորումը:
 Նախարարն առաջարկեց ներկայացնել Հունաստանի այն քաղաքների եւ դպրոցների ցանկը, որտեղ նպատակահարմար է բացել հայկական մեկօրյա դպրոցներ կահունական դպրոցներում դասավանդվեն հայոց լեզու եւ հայ ժողովրդի պատմություն: Բացի այդ, առաջարկվեց Հունաստանում ակտիվացնել իրավաբանների, բանկիրների եւ ֆինանսիստների 2009թ. Երեւանում անցկացվելիք համահայկական համաժողվներին նախապատրաստական աշխատանքները եւ ապահովել այդ միջոցառումներին նշված ոլորտների հունահայ մասնագետների հնարավորինս առավելագույն մասնակցությունը:
 Նախարար Հ. Հակոբյանը նաեւ հորդորեց սկսել հունահայ համայնքի եւ ՀՀ սփյուռքի նախարարության ՙՀայերն այսօր՚ էլեկտրոնային թերթի համագործակցությունը, ինչը կընձեռի թերթում համայնքի կազմակերպություններն ու ականավոր գործիչներին ներկայացնելու հնարավորություն: Նա ցանկություն հայտնեց, որ համայնքը 2010թ. մասնակցի նախարարության ՙԱրի տուն՚ ծրագրին: Նախարարը կոչ արեց, որպեսզի հունահայ համայնքն առավելագույնս ներկայացված լինի 2010թ. անցկացվելիք ՙՄեկ ազգ` մեկ մշակույթ՚ հերթական փառատոնին եւ տեղեկացրեց, որ նախարարության կողմից քայլեր են ձեռնարկվում, որ այդ միջոցառումն, ի տարբերություն նախորդ տարիների, անցկացվեն ամբողջ տարվա ընթացքում:
 Հունահայ համայնքի ներկայացուցիչները հավաստեցին, որ կանեն հնարավորը նախարար Հ.Հակոբյանի նշած ծրագրերի իրագործմանն աջակցելու համար:
 Անդրադառնալով համայնքի մշակութային նախաձեռնություններին` հյուրերը տեղեկացրին, որ նոյեմբերին Հունաստանում համերգներով հանդես կգա Թ.Ալթունյանի անվ. երգի-պարի պետական անսամբլը, իսկ 2010թ. մայիսին Աթենքի օպերային թատրոնում նախատեսվում է հայ երաժիշտների մասնակցությամբ բեմադրել Ալ.Սպենդիարյանի ՙԱնուշ՚ օպերան:
 Նախարար Հ.Հակոբյանը հավելեց, որ անհրաժեշտ է գտնել Սփյուռքի հեղինակավոր կազմակերպությունները որոշակի լիազորություններով օժտելու օրենսդրական լուծումներ: Այդ լիազորությունները կարող են վերաբերել Հայաստանի քաղաքացիություն ստանալու ցանկություն ունեցող, սակայն հայ լինելը հավաստող փաստաթուղթ չունեցող սփյուռքահայերին համապատասխան փաստաթղթի, Հայաստանում երեխա որդեգրելու ցանկություն ունեցող սփյուռքահայերին համապատասխան հնարավորություններ ունենալու երաշխավորագրի տրամադրման և այլ հարցերին: Տիկին Հ.Հակոբյանի կարծիքով, Սփյուռքի կազմակերպություններին նման լիազորություններով օժտելը կնպաստի սփյուռքահայ-Սփյուռքի կազմակերպություն-Հայաստան կապերի ամրապնդմանը:

« Предыдущая новость Все Новости армянской диаспоры Следующая новость »