Սկզբում ՀՀ սփյուռքի նախարար Հրանուշ Հակոբյանը տեղեկացրեց, որ ավարտվեց ՙԱրի տուն՚ ծրագրի առաջին երկշաբաթյա փուլը: Դրա եզրափակիչ միջոցառումը` հրաժեշտի երեկոն, անցկացվել է ՀՀ նախագահ Սերժ Սարգսյանի մասնակցությամբ: Նիստի մասնակիցներից շատերը հավաստեցին, որ ՙԱրի Տուն՚ ծրագրի առաջին փուլը հաջողությամբ է անցել եւ նպաստել ինչպես Հայրենիք-Սփյուռք, այնպես էլ Սփյուռքի տարբեր համայնքների միջեւ կապերի զարգացմանը:
 Հիմք ընդունելով  Հանրապետության Նախագահի եւ ՀՀ կառավարության ծրագրերում հայրենադարձությունը` իբրեւ պետական քաղաքականության կարեւորագույն բաղադրիչ դիտարկելու փաստը, ինչպես նաեւ հաշվի առնելով Հայաստանի Հանրապետության համար ժողովրդագրական եւ հանրապետության տարածքային-ռազմավարական խնդիրների լուծման նպատակով հայրենադարձության կարեւորությունը` ՀՀ սփյուռքի նախարարությունը  վերամշակել է  հայրենադարձության գործընթացը խթանող ծրագրի մշակումը:

 Նախագիծն ընդգրկում է Հայրենադարձության բարդ եւ բազմափուլ գործընթացում առկա հիմնախնդիրները` ներառելով Հայրենիքի եւ Սփյուռքի համատեղ հետեւողական աշխատանքը, այդ թվում` հայրենադարձների ամբողջական ինտեգրումը Հայաստանի հասարակական, քաղաքական, մշակութային եւ սոցիալ-տնտեսական կյանքին:
 Հայկական ինքնության, ուծացման գործընթացից սփյուռքահայության տարբեր հատվածները պաշտպանելու եւ նրանց Հայրենիք վերադարձնելու առումով հայրենադարձությունն, ընդհանուր առմամբ, հանդիսանում է հայապահպանության գրավական, ուստի ՀՀ սփյուռքի նախարարին կից ատյանի անդամները որոշում ընդունեցին հիմք ընդունել մշակված փաստաթուղթը` ՙՀայրենադարձության գործընթացին խթանող ծրագրի՚ նախագիծը:

 ՙՀայրենադարձության գործընթացին խթանող ծրագիր՚-ը բաղկացած է հետեւյալ բաժիններից.
1. Հայրենադարձության գործընթացի կազմակերպման փուլերը եւ կառուցակարգերը,
2. Հայրենադարձների ինտեգրման հիմնահարցերը եւ դրանց լուծման ուղիները,
3. Հայրենադարձության մասին ՀՀ օրենքի նպատակը, խնդիրները եւ սկզբունքները:
 Օրակարգի հաջորդ հարցը վերաբերում էր 2009 թվականի առաջին կիսամյակում ՀՀ սփյուռքի նախարարության կատարած աշխատանքներին` Հայաստանի եւ օտարերկրյա քաղաքացիների ընդունելությանը, նրանց առաջարկություններին, դիմումներին եւ բողոքներին: Ըստ ՀՀ սփյուռքի նախարարության աշխատակազմի քարտուղարության պետ Գայանե Մխիթարյանի, 08.01.2009- 01.07.2009 ընկած ժամանակահատվածում նախարարություն ստացվել են ամենատարբեր բնույթի 899 առաջարկություններ, դիմումներ եւ բողոքներ, որոնցից 671-ը ՀՀ, իսկ  228-ը օտարերկրյա քաղաքացիներ են: Ստացված բոլոր գրություններին տրվել է համապատասխան ընթացք:
 Ատյանի անդամների ուշադրությանը ներկայացվեց նաեւ ՀՀ Սփյուռքի նախարարության մեկամյակին նվիրված միջոցառումների ցանկը: Այն ներառում էր ՀՀ սփյուռքի նախարարության մեկամյա գործունեությունը ներկայացնող  ամենատարբեր միջոցառումներ` մամուլի ասուլիս, կլոր սեղան, ՙՀայերն այսօր՚ էլեկտրոնային թերթի հատուկ համարի թողարկում, ՙՀայրենիք-Սփյուռք՚ գործակցության վերաբերյալ պաշտոնական նյութերի ժողովածուի հայերեն եւ անգլերեն լեզուներով հրատարակում, շնորհանդեսի կազմում եւ այլն:
 Օրակարգի հաջորդ հարցն առնչվում էր ՙՄեկն ազգ, մեկ մշակույթ՚ հիմնադրամի ծրագրերին: Հիմնադրամն իր  նպատակներին համահունչ Հայաստանում եւ Սփյուռքում իրականացրել է նախնական աշխատանքներ 2010թ. ՙՄեկ ազգ, մեկ մշակույթ՚ փառատոնը հավուր պատշաճի կազմակերպելու համար: Անհրաժեշտություն համարվեց կազմակերպել եւ աջակցել մշակույթի բնագավառի մասնագետների պատրաստման եւ վերապատրաստման, տեղեկատվական շտեմարանների եւ ցանցի ստեղծմանը, ՀՀ-ում մշակութային զբուսաշրջության զարգացման աշխատանքները: Ներկայացվեց նաեւ  ՙՄեկ ազգ, մեկ մշակույթ՚ հիմնադրամի իրականացրած ծրագրերի, ինչպես նաեւ 2009թ-ի երկրորդ կիսամյակի եւ 2010 թ. նախատեսված միջոցառումների ցանկերը: