Ողջունելով հյուրին` գերատեսչության ղեկավարը գոհունակություն հայտնեց Իտալիայի եւ Հայաստանի Հանրապետությունների միջեւ տնտեսական, կրթական եւ մշակութային կապերի առավել ակտիվացման երկուստեք ջանքերի գործադրման ուղղությամբ:  Նախարարը ներկայացրեց նորաստեղծ սփյուռքի նախարարության գործունեության հիմնական ուղղությունները` Սփյուռքի պահպանությունը եւ կապերի ակտիվացումը Հայրենիքի հետ, Սփյուռքում հայ ներուժի վերհանումը եւ օգտագործումը Հայրենիքում եւ, ի վերջո, հայրենադարձությունը: Խոսելով հայկական Սփյուռքի առանձնահատկությունների մասին` տիկին Հակոբյանը կարեւորեց Իտալիայի հանրապետության բազմամյա փորձը, որը կարող է օգտակար լինել ՀՀ սփյուռքի նախարարության համար:
Պարոն Սկապինին իր հերթին նշեց, որ Հայաստանն իրեն շատ հոգեհարազատ է:
Երկար տարիներ աշխատելով Հռոմի ԱԳՆ համակարգի Իրավաբանական վարչությունում, Վերահսկողության Գլխավոր վարչությունում և Նախարարների խորհրդի նախագահությունում` որպես Արտեկրում բնակվող իտալացիների հարցերով վարչության պետի պաշտոնակատար` պարոն Սկապինին  անմիջական մասնակցություն է ունեցել ՙԱրտերկրում իտալացիների Գլխավոր խորհրդի մասին՚ օրենքի ընդունման աշխատանքներին: Դեսպանը նշեց, որ, վերոհիշյալ օրենքով են կարգավորվում սփյուռքում ապրող իտալացիների հարաբերությունները Հայրենիքի հետ: Խոսելով իտալական սփյուռքի առանձնահատկությունների մասին` դեսպանն առաջնահերթ համարեց Հայաստանում սփյուռքահայերի գործունեությանը, ներդրումներին, հայրենիքում վերաբնակեցվելուն վերաբերող օրենքների ընդունումը, Հայրենիք-Սփյուռք մասնագիտական համաժողովների կազմակերպումը:
Այստեղ, իհարկե, Հայաստանի Հանրապետության դեռեւս մանուկ նախարարությունն արդեն իսկ զարմացնելու բան ուներ: Նախարար Հրանուշ Հակոբյանը ներկայացրեց 2009թ. ապրիլի 21-24-ը Հայաստանում անցկացված ճարտարապետների համաժողովի աշխատանքները:
ՙՀրաշալի միտք է Արարատյան դաշտավայրում համայն աշխարհի հայ ճարտարապետների միասնական ջանքերով Աշխարհի քաղաք հիմնելու գաղափարը՚,- տպավորված խոսեց Իտալիայի դեսպանը:
Քննարկվեցին Մխիթարյան միաբանությանը, Իտալիայի հայությանը վերաբերող մի շարք հարցեր:
ՙԵս համոզված եմ, որ Ձեր այցելությունը նոր թափ է հաղորդելու մեր երկրների մշակութային, կրթական, գիտական ոլորտների համագործակցության ակտիվացմանը՚,- եզրափակեց ՀՀ սփյուռքի նախարարը:

« Предыдущая новость Все Новости армянской диаспоры Следующая новость »